Ling's profileTell You Something....PhotosBlogListsMore  |  Tools Help |
|
|
October 04 鬆一口氣30-9-2009 (WEEK13)
終於到左呢日喇 - - - OSCAR (唐氏綜合症)
由知道自己懷孕之後
一直好擔心嘅問題 呢日有結果喇
之前嘅一日 非常緊張
緊張到瞓唔到
可能因為黃生陪唔到我去(工作關係)
一個人面對好驚 好驚 ...
到了診所 首先進行超聲波度頸皮檢查
一開機 已經見到小虎不停擧手同腳"young young"
我愕然: "哇....郁得咁勁嘅?!識郁架喇?"
醫生 : "哈...點解咁多人認為佢未識郁?!其實佢一早已經郁緊 太細 FEEL唔到啫!"
嘻....係呀!咁您快d俾mami feel 下你啦!!
跟住醫生開始解釋我聽度頸皮喇
邊度係頸皮位置呀
超過2.5cm屬高危
而我度出 1.8cm
"@@ 1.8?! 咁我正常 無事喇喎?"
"係呀 度頸皮無事 無問題!! 但要加埋抽血 等埋化驗結果 再計算有幾多成呢"
oh....原來只係過左第一關
突然...喇叭播出好密嘅"boom boom"聲
醫生同我講 係小虎嘅心跳嚟架
嗰一刻 心情有d激動
有d想喊 (我係咪痴痴地)
因為我覺得同小虎好接近呀
唔只見到您 仲可以聽到你呢~
但....點解跳得咁密嘅
"正常架 正常160-180下嘅!"
"ok喇! 出去姑娘同你抽血 今晚18-19點有結果架喇!"
到傍晚收到電話
結果9X%正常 (因為測試只去到9x% 無百分百)!!
哇...好想大叫出嚟...好開心呀!!
可以不可以自從"黃小虎"嘅出現
我一直都感到好困惑
 咩係可以 咩係唔可以呢
我唔係有太大頭緒
有人話可以
 又有人同我講唔可以點解無LIST列明嘅呢?!
搞到我有時一舊雲咁樣...
 有時諗埋好多無謂嘢
．講俾人知 佢會點小氣我架
．講俾人知 佢會知嘅話 咁我對住佢講嘢 會唔會聽唔聽到架呢
．應該咩姿勢瞓覺呢
．幾時買核突ＵＮＤＥＲ（即大大條高腰款呢）
．幾時轉ＢＲＡ
．咁遲Ｄ著褲 褲頭應該"休"到肚底定"休"高包住個肚呢
．我可唔可以跑幾步追巴士呢
．好想洗牙呀 得唔得架
．我鼻敏感 成日"打噴嚏" 咁個肚會好大力收縮架嘛 會唔會整到佢架
．好多恐怖驚慄片上畫呀 好想睇．．．但係咪會嚇親佢架
．我同黃生邊個做好人 邊個做衰人呢
．生女仔好 Ｄ衫靚好多
．又好似生仔好Ｄ噃 唔會俾人呃
．我將會肥幾多呢
September 28 愛的承諾今日收工返到屋企
如常食飯...上網...
到我準備沖涼嘅時候
都會拉開呢個黃生成日攞嚟話我嘅柜桶
 (
 好亂咩?!但 我知d嘢喺邊架噃!!) 咦....點解有張咭嘅? 仲要"請簽名"......(奇奇怪怪咁嘅!!)
等我搣開張紙睇睇先...
 乜我成日發脾氣架咩?!
 點知調轉背面睇....
 哈哈....
傻佬~係咪架?! 真係笑左出嚟呢!!SO FUNNY 呀!!好SWEET呀!!
呢張咭其實係一個阿姨個仔
前幾年投左個位賣年宵
賣嘅係"甜襪襪" 送左兩盒俾我
每個盒 裝左兩對襪
而襪上面印左D公仔
另外放有呢張咭嘅
襪就無著過喇 佢淨係要個盒
但...唔知點解張咭仲KEEP住....
突然令我諗起...唔只呢張架噃
N年前 黃生喺我強迫之下
寫左張"愛的宣言"架噃
等我抄返出嚟先
 哈哈...我都話我知D嘢擺喺邊架啦!!
記得寫完之後
我攞去囇相舖過膠
個姐姐仔仲陰陰咀笑我TIM呀!! (佢唔抵得我!!)
嘻嘻.....多謝您吖
 (搞到我成晚都笑咪咪)
August 22 鬧情緒?!我的性格會隨"您"改變嗎?!
我變得很在意別人說起"您"
變得很薄皮 很情緒化
常常躲著哭...
還要在人前人後裝兩個樣
真不想別人看出我的緊張
這對於現在的我有點吃力
這樣下去 真的很怕會影響"我們"呢
June 02 好孩子今晚老公同同事食完飯返嚟
拎衫入厠所準備沖涼
突然叫喺房正在梳緊頭嘅我行出嚟
當時佢企左喺鞋架同厠所中間
同我講 : "你睇吓 ! "
啱啱沖完涼嘅我喺度諗
"唔通我又留左嘢喺厠所 ?! "
咁我即刻行入去睇吓啦
佢就指住鞋架叫停我 : "呢度呀 ! "
睇到嗰一刻大家笑左出嚟
跟住老公就叫我影低佢俾聰媽睇喇 !
  大家睇到嗎????  哇哈哈....聰聰好乖仔喎
將小鞋子都整整齊齊放上鞋架上面啊~
May 07 結婚一週年喇09年4月27日係我哋嘅結婚一週年
一直喺度諗 唔知送乜俾HONEY好呢
 突然諗到....不如又整蛋糕俾黃生吃啦
好讓我一雪前恥
話說某個黃生生日
我前一日走去學人整 tiramisu
咁我咪走去嗰D教人整蛋糕嘅鋪頭
點知D course full 哂
但第日就係正日
唯有買材料返屋企自己整啦
因為從來都未整過蛋糕嘅關係
所以我就揀左速成嘅材料包
即係省卻左發蛋 加麵粉 加奶等等 呢D程序
只須將嗰D唔知咩粉加水 手指餅同咖啡酒就可以
做法簡單到痺!!
第日我滿心歡喜拎左個蛋糕上黃生屋企
我見到佢當時都幾驚喜架
跟住我哋就切都唔切
拎住個匙羹就咁"畢"嚟食
當我哋一放入口
即時你眼望我眼
心諗: "哇....咁難食嘅!!點解有陣香蕉味嘅..."
 我當時真係好想噴返舊蛋糕出嚟
因為我係唔食香蕉架
跟住見到黃生將D蛋糕係咁"畢"入口
直到佢食左三分一左右
放低隻匙羹 問我唔食得唔得
我答佢OK 唔好食喇
佢企起身 跟住走入厠所............刷牙
刷完"翁"哂面走出嚟同我講
"點解仲有陣味喺口架???"
仲話"下次唔好搞咁多嘢喇!!"
 嗚.......我嗰刻好想搵個"洞"損呀!!!簡直好似有個雷劈落我個頭度
雖然我自己都覺得好難食
但..好HURT我啫 俾吓面好喎!!
 所以今年請嚟有多次整蛋糕經驗嘅師傅---未來弟婦 教路
我要爭氣 叻返一次俾佢睇         呵呵....黃生都讚GOOD呀!! 非常多謝MAGGIE教導 小女無以為報 就喺度
 你一啖啦~多謝二姑奶&奶奶 話以為個蛋糕係買返嚟 氹得我非常開心啊<--- =.= 仲自我陶醉緊
亦非常抱歉 隻肥豬食埋你嗰件
下次有機會 一定預留
仲有聰聰 tim呀 黃生同我講佢係咁話good呀~
哇哈哈.......
March 16 >.<驚驚.....星期六同舊同事們喺蝴蝶灣BBQ
燒到12點行返屋企
返到屋企樓下"車立"口
當時部"車立"停喺10樓
咁我"禁"完"車立" 跟住望住個閉路電視
當去到一樓時
我見到有個中年男子入"車立"
嗰刻我心裡面喺度諗
"妖!!一樓就行樓梯啦!!搭乜"車立"啫!!"
咁我跟住退後一步
諗住讓俾個阿叔出"車立"
點知.......... (溫馨提示:驚就唔好睇落去)
個"車立"門打開左
但裡面係無人架!!@.@"
嗰刻我個心驚到實左
有少少透唔氣>.<
跟住我行入"車立"
喺度諗:明明肯定見到有人喺一樓入"車立"
下一層就係G樓
佢無可能喺另一層出左架
跟住我就摷定鎖匙
一出"車立"就跑返屋企開門入去
即刻同黃生講
跟住我哋講返上次嘅電梯"驚"歷
上次我哋兩個夜晚返屋企等"車立"
嗰次部"車立"係停喺頂樓
到左中層咁上下
我同黃生都睇到閉路有個男人入左去
當到左地下開門嘅時候
入面係無人架
嗰刻我同黃生對望
"入唔入呀?"
跟住我哋都係行左入去
然後大家都無出聲
返到入屋我哋先再討論頭先嘅情況
黃生話可能佢中途出左"車立"
因為睇到個男人入去後
我哋都無再望個閉路
可能係自己嚇自己
咁我唯有係咁啦
但今次我係肯定架....
February 14 我們的情人節餐今日係情人節
諗住同老公仔煮嘢食
原本我打算我最愛嘅蒸魚同油菜
但佢話尋晚咪食左囉
佢話想食牛扒同雞翼....
以下就係我哋今晚嘅情人節餐:
．濃情化不開忌廉湯
．情比金堅煎雞翼
．一見鍾情煎牛扒
．情意綿綿小籠包
．情深似海炒烏冬
甜品緊係 情深的一
 啦哈哈.....
祝各位 情人節快樂呀~
January 12 虐妻話說黃生好唔鍾意我開住部電腦又走去睇電視
尋晚節目非常豐富
獎門人--close the door <--i VERY like
品味咖啡--陳豪 <--i LOVE u
星星同學會 <--ho cow siu
我如常無熄電腦
淨係熄左個芒
出廳睇電視
黃生就喺房睇"珠光寶氣"
我睇到廣告
行入房禁下部電腦先
當我開著個芒後
俾眼前見到嘅嘢嚇傻
feel到心跳停頓
繼而 哇........ 一聲 <--我慘叫
跟手
 喊........ <--唔駛兩秒 絕無誇大黃生凸哂眼問我:"你好驚呀?"
我喊住:"嗚....我真係好驚呀.....嗚......你係咪想我死呀...???"
跟住佢即刻將個wallpaper轉返
走過嚟氹我
講到呢度 係咪想知發生乜事呢....
變態嘅黃生襯我睇緊電視嗰陣
將我嘅 sweet wallpaper
轉左做一幅有成個芒咁大嘅蜥蝪圖片
我不嬲都非常超級極度驚蜥蝪呀四腳蛇呀
嗰類爬蟲類架
細個喺圖書館攞左本動物書睇
點知揭到一頁係全幅左右兩邊連埋嘅一條大蜥蝪
而咁啱我其中一隻手指掂住呢隻嘢
我嚇到成本書掉落地下唔理
有次同黃生去左市鎮公園嗰間爬蟲館
蜥蝪類會放左玻璃櫃入面
我哋睇睇吓
變態佬又發作
想"禁"我個頭埋玻璃度
好彩我掙扎成功
亦有次喺泰國曼谷一個shopping mall
行行吓 行到玩具部
我哋兩個同一時間見到一堆
有蛇呀 老鼠 蜘蛛 等等勁核凸嘅塑膠公仔
呢條友仔又嚟料
拎左條蛇嚟嚇我
你追我逐咁 跑到另一部門
啲sales姐姐企哂喺走廊度笑我哋
上次去廸士尼
當我哋行緊入去嗰陣
突然黃生同我講路邊個垃圾筒
側面有條蜥蝪"僕"左喺度
我唔信 就探頭裝過去
原來真係有架
嚇到差啲瀨尿(當時我係相當急尿嘅)
(仲有好多 不能盡錄...)
總言之 假又好 隔住玻璃又好 就算只係圖片又好
我都接受唔到
好彩今次黃生唔係返夜
如果佢整完張wallpaper走左去返工
我收工返嚟開電腦見到
又唔敢熄電腦 我一定崩潰
同埋我會執埋啲衫返娘家瞓
事後 黃生話下次買條假蜥蝪放喺床頭
嗚........救命呀!!!!!
January 07 有心人@感動篇鄭氏--一個好有心嘅家庭
一戶舊鄰居 細女係我細佬小學同學
兒時我哋三隻嘢 成日走上佢哋屋企玩嘅鄭氏
16年前移民美國 兩年後返過嚟香港 同我哋三姊弟妹講
14年後會再返嚟香港揾我哋
上星期返到嚟揾唔到我哋
因為我家已搬離舊居又改埋電話
鄭太竟然走到我媽以前做過嘅友愛街市
四圍問人"知唔知阿梁玉玲 梁國豪 梁寶儀佢哋喺邊呀?"
哈哈..咁答案就係當然問唔到啦
街市邊有人識我哋幾隻嘢啫
點知鄭太又無放棄 繼續問
問到一生果檔時
個老闆反問返佢"係咪霞姐(即係我媽)?"
佢就同老闆講"我唔知佢媽係咪叫霞姐?!" <---(因為佢不嬲都叫我媽做梁太)
老闆就叫佢問吓豆腐婆啦
佢好似知佢去左邊度做呀
咁豆腐婆就同鄭太講
我媽而家喺蝴蝶邨嗰邊
之後鄭太又走到蝴蝶邨呢邊四圍揾
最後皇天就梗係不負有心人啦
因為媽當時開緊工 將細佬電話俾左鄭太
跟住我就收到細佬電話得知此事
@@原來除左我阿媽 會有人週街揾我哋
感到十分愕然 百分期待 萬分感動~
收線後 我同同事講
哈哈..佢哋竟然話"你哋爭佢錢呀?" <--無情的香港人
到左今晚我哋嘅晚餐聚會
傾吓大家近況
又講左好多返到香港嘅趣事 <--畢竟走左已經十四年 內容超攪笑
鄭太三母女都無變 仍然風趣
不過呢晚有個遺憾
就係俾佢哋爭贏左請食飯 <-- =.= 細佬真係無鬼用
多謝您哋呀 今晚好開心啊!!
 P.S. 另外好高興見到鄭氏新成員-- 8歲嘅弟弟 --鄭細佬
December 22 回想2008今年做左好多嘢...
因為完成左一項極麻煩既難忘嘅項目
就係嫁左俾一個我愛嘅人--黃生
 全程plan左差唔多成年
當中其實都有留過好多眼淚
以前我從來無諗過攪結婚係咁煩
要準備嘅嘢原來係咁多
樣樣都係錢都唔在講
 最頭爆係我爸媽離左婚兩人都各有意見
而我同黃生亦一樣
好多嘢都拗到面紅耳赤 @#x*%..
唉..但最後就梗係順利渡過啦~
真係要喺度再次多謝所有幫過我哋嘅人呀!!!
好多人都問過我
點解可以對住一個人十年 唔厭架咩?
無架喎 你咁問我
我反而想問返你
乜愛一個人會厭架咩
其實我唔覺原來已經十年架喇
可能因為佢嘅工作關係
我哋都算係聚少離多
所謂小別勝新婚
我都會keep住有掛住佢嘅感覺
所以十年對我嚟講無難度噃
喺呢段日子裡面
發生過好多事
我呢一世都唔會忘記
當中有好多嬲到想死
 但都有好多係冧到爆嘅 ..嘻嘻..
 面紅添希望到我做左伯爺婆嘅時候
你呢個伯爺公仲會拖住我落街散步吖~
而09年嘅項目係..
唔該啲經濟快啲好返啦
因為我想做媽咪呀!!!!
December 02 月亮對我笑..尋日返屋企坐巴士途中
收到詩敏嘅message
內容大概:
"大家今晚記得看月亮
會見到難得一見的天文現象
出現臉"
睇完嘅反應係"吓 臉??"
跟住我抬頭搵月亮啦
搵左一陣 我立即笑左出嚟
哇..好得意呀...
跟住叫埋黃生睇o添
有名堂架 - - 雙星伴月
原來嗰兩粒唔係星星
而係月亮同埋金星、木星同時出現在夜空
個月亮笑臉出現喺香港嘅夜空
唔通香港有運行..?!
November 25 證據確鑿!!一個同黃生爭拗多次嘅問題--攬被 一係攬住張被 仲要捲住個身 要知道阿老公你有幾多磅 我抆都抆唔到 一係就連被都唔要 掉張被落地 佢自己就捲到成隻虾咁繼續瞓 我就要死死氣拎返張被上嚟>.< 我已經有不知幾多嗰夜晚凍醒 今朝起身 我又好似平時咁無被"琴" 落床嗰刻突然諗到 "攞部相機影低先 等你無得唔認!"
喇喇喇.. 攬被呀!
佢突然轉身 仲好 影得仲清楚 你睇吓佢攬左幾多被 而我瞓嗰邊(白色圈圈)嘅濶度就不足一呎....
咁多?!喺大約一年前黃生開始儲大餅
將啲兩蚊 五蚊同十蚊
放哂落個蛋卷鑵入面
早排同佢喺屋企食飽飯無嘢做
佢話不如數下有幾錢
哇..儲左都有成大半個鑵架
約廿分鐘後..
肉蟲與大餅
@@原來有成七千幾蚊喎.. 中秋夜中秋嗰晚
同黃生食完飯
黃生提議到蝴蝶灣浪漫一番
其實係行個圈至真
呢晚沙灘好多人呀
十足十六四燭光晚會咁
想搵個位"薜"入去都難
行行下 突然有人歡呼拍掌
我哋望過去
@@"哇....孔明燈呀!!!"
我咁大個女第一次見到咋
好好奇咁 望o左一陣先走
當行到美樂街市嗰陣
我哋見到有小販隊捉小販
嗰刻我喺度諗
"唉..好心啦 一日錢都唔比人賺 討厭"
望過去 好靚
吸引住我嘅孔明燈 September 20 大強!!!!以下圖片可能引致各下不安
敬請見諒 (係黃生叫我 post o架>.<)
於9月8日晚上
我沖完涼坐喺床度梳緊頭
突然有個黑影喺我面前掠過
再飛過企喺床尾嘅黃生個頭
繼而"痴"o左喺衣櫃門
大家唔好誤會
呢度唔係"怪談"
我見到嘅並唔係鬼魂
而係一隻甴曱
佢並唔係一般小強size
係有我手指公咁長嘅"大強"<---(可能更長 絕無誇張)
因為我知黃生非常之驚甴曱
我驚我嗌出嚟實嚇死佢
所以我"敏"實個咀細細聲同黃生講
@@"呀....甴曱呀...."
聽完之後
我哋兩個一齊衝出房<---(第一次發現原來我哋係咁夾)
企喺廳度你眼望我眼
因為想知"大強"爬o左去邊
黃生就行到房門探頭入去望
佢望到後即刻退後瞪大眼同我講
"哇!!!佢"冷"o左上櫃頂呀 條鬚好長呀!!"
呢一刻我哋知道
如果今晚唔殺"大強"
我哋就會無得瞓
跟住黃生就走去鞋櫃攞武器<---(佢結婚著嗰對皮鞋 上次又係攞呢隻鞋嚟打甴曱)
我哋企o左喺房門度諗辦法之際
"大強"突然發癲 亂咁撞牆飛
最後著陸地面
黃生見到後 立即運功大嗌 "呀....."
衝入房 舉起手用隻鞋大力拍落去
完事後 佢好似虛脫咁行出廳
指住心口同我講"你摸下.."
@@哇...心跳得勁快
我諗如果佢心臟有事的話
佢應該一早暈低o左
跟住到我哋打算清理現場嗰陣
佢突然叫停我
"咪住 攞部相機出嚟影低佢 再同我post上網"
=.=" 我諗..黃生認為佢呢晚
做o左一件好轟烈嘅事"頂"喇....
點都好啦
喺度多謝你為國家銷滅o左一隻害蟲
多謝你呀 英雄~
亦因為已經第二次飛入甴曱嘅關係
過o左兩日英雄買o左個防蟲網喇!! September 05 我們的10週年2008年9月4日
係我同黃生拍拖10週年
上個月我同D同事講
佢哋話 "已經結o左婚
咩10週年啫 要重新計過!"
=.=哼..男人真係識計"宿"數
原本諗住同黃生
join啲兩日一夜團玩吓啦
點知我未講我嘅計劃
佢已經話 "你又想搞乜呀 喺屋企睇碟啦!!"
咁我已經唔敢講
將個計劃"good"一聲吞返落肚
再同佢講"唔知你呀 你plan定同我去邊啦!!"
但我已經有哂心理準備
>.<乖乖地留喺屋企睇碟啦
到咗果日 我放工返到屋企
打住機等佢返嚟落街食飯
佢返到嚟入房
我都無望過佢 (因為我十分專注地打緊機)
跟住佢就叫我 "你睇吓!!"
我一望 "嘩........"
嗚...(<--開心到想喊) 又一個驚喜呀
原來黃生唔係無準備o架
雖然無去邊度玩
但我已經好開心 好滿足喇~
上年9週年又係咁(雙重驚喜)
一直堅持唔送花嘅黃生 喺9週年果日
偷偷地買o左扎花同我求婚 "num"爆呀
-^.^- 多謝您呀 老公~
啜........
August 26 柯柏芝公司樓上每隔一排就會有開倉
玩具呀 護髮用品呀
衛生&嬰兒用品 甚至零食..
"立""立"雜雜 乜都有
今期又輪到玩具開倉喇 !
呢次集中嬰兒玩具 奇樂膠(泥膠) & 變形金剛
當中最受矚目係我組個男同事
佢買o左個柯柏文嘅頭盔
真係可以戴o係個頭度o架
仲要有內置咪
"禁"頭盔側面個掣
說話就會變成--->聲音經過處理咁
勁似機械人把聲 非常過癮
都係承惠一百大元(聽聞原價要四舊幾水)
因為咀嘅位置有少少甩油
仲要一千零兩個
另一個係壞 所以咁平囉
矚目嘅原因係呢位同事
唔怕醜戴住佢周圍行
"禁"著個咪係咁講 :
"哈哈...我係嚟拯救地球.."
而我都極度唔怕醜咁
叫個同事比我戴住影o左張相
"哈哈..你好 我係柯柏文個妹--柯柏芝"
SO COOL~ |
|
|
